ਪ੍ਰਧਾਨ ਮੰਤਰੀ ਨੇ ਦਿਖਾਈ ਝੰਡੀ; ਹਾਵੜਾ–ਗੁਹਾਟੀ ਵਿਚਕਾਰ 14 ਘੰਟਿਆਂ ’ਚ 958 ਕਿਲੋਮੀਟਰ ਦਾ ਸਫ਼ਰ
ਰੋਜ਼ਾਨਾ ਖ਼ਬਰ
ਮਾਲਦਾ, 17 ਜਨਵਰੀ
ਦੇਸ਼ ਨੂੰ ਪਹਿਲੀ ਵੰਦੇ ਮਾਤਰਮ ਸਲੀਪਰ ਰੇਲ ਗੱਡੀ ਦੀ ਸੌਗਾਤ ਮਿਲ ਗਈ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਇਸ ਆਧੁਨਿਕ ਸਲੀਪਰ ਟ੍ਰੇਨ ਨੂੰ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। ਇਹ ਰੇਲ ਗੱਡੀ ਪੱਛਮੀ ਬੰਗਾਲ ਦੇ ਹਾਵੜਾ ਤੋਂ ਅਸਾਮ ਦੇ ਗੁਹਾਟੀ (ਕਾਮਾਖਿਆ) ਤੱਕ ਚੱਲੇਗੀ ਅਤੇ 958 ਕਿਲੋਮੀਟਰ ਦੀ ਦੂਰੀ ਸਿਰਫ਼ 14 ਘੰਟਿਆਂ ਵਿੱਚ ਤੈਅ ਕਰੇਗੀ।
180 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਅਧਿਕਤਮ ਰਫ਼ਤਾਰ ਵਾਲੀ ਇਸ ਟ੍ਰੇਨ ਵਿੱਚ ਕੁੱਲ 16 ਡੱਬੇ ਹਨ। ਇਨ੍ਹਾਂ ਵਿੱਚ 11 ਏਸੀ ਥਰਡ ਟੀਅਰ, 4 ਏਸੀ ਸੈਕਿੰਡ ਟੀਅਰ ਅਤੇ 1 ਫਸਟ ਏਸੀ ਡੱਬਾ ਸ਼ਾਮਲ ਹੈ। ਇੱਕ ਵਾਰ ਵਿੱਚ ਇਸ ਰੇਲ ਗੱਡੀ ਰਾਹੀਂ 1128 ਯਾਤਰੀ ਯਾਤਰਾ ਕਰ ਸਕਣਗੇ।
ਕਿਰਾਏ ਦੀ ਗੱਲ ਕਰੀਏ ਤਾਂ ਏਸੀ ਥਰਡ ਟੀਅਰ ਦਾ ਕਿਰਾਇਆ 2300 ਰੁਪਏ, ਸੈਕਿੰਡ ਏਸੀ ਦਾ 3000 ਰੁਪਏ ਅਤੇ ਫਸਟ ਏਸੀ ਦਾ 3600 ਰੁਪਏ ਤੈਅ ਕੀਤਾ ਗਿਆ ਹੈ। ਰੇਲ ਮੰਤਰੀ ਨੇ ਦੱਸਿਆ ਕਿ ਗੁਹਾਟੀ–ਹਾਵੜਾ ਰੂਟ ’ਤੇ ਹਵਾਈ ਯਾਤਰਾ ਦਾ ਕਿਰਾਇਆ ਆਮ ਤੌਰ ’ਤੇ 6 ਤੋਂ 8 ਹਜ਼ਾਰ ਰੁਪਏ ਦੇ ਦਰਮਿਆਨ ਹੁੰਦਾ ਹੈ, ਜਦਕਿ ਵੰਦੇ ਮਾਤਰਮ ਸਲੀਪਰ ਰੇਲ ਗੱਡੀ ਰਾਹੀਂ ਯਾਤਰੀ ਸਿਰਫ਼ 2300 ਰੁਪਏ ਵਿੱਚ ਆਰਾਮਦਾਇਕ ਸਫ਼ਰ ਕਰ ਸਕਣਗੇ।
ਰੇਲ ਗੱਡੀ ਦੀ ਰਵਾਨਗੀ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਟ੍ਰੇਨ ਦੇ ਅੰਦਰ ਬੱਚਿਆਂ ਨਾਲ ਗੱਲਬਾਤ ਵੀ ਕੀਤੀ। ਪ੍ਰਧਾਨ ਮੰਤਰੀ ਦਫ਼ਤਰ ਵੱਲੋਂ ਜਾਰੀ ਬਿਆਨ ਅਨੁਸਾਰ, ਇਹ ਟ੍ਰੇਨ ਆਧੁਨਿਕ ਭਾਰਤ ਦੀਆਂ ਵੱਧਦੀਆਂ ਆਵਾਜਾਈ ਜ਼ਰੂਰਤਾਂ ਨੂੰ ਧਿਆਨ ਵਿੱਚ ਰੱਖ ਕੇ ਤਿਆਰ ਕੀਤੀ ਗਈ ਹੈ ਅਤੇ ਇਸ ਵਿੱਚ ਉੱਚ ਦਰਜੇ ਦੇ ਸੁਰੱਖਿਆ (ਐਡਵਾਂਸਡ ਸੇਫਟੀ) ਫੀਚਰਜ਼ ਸ਼ਾਮਲ ਹਨ।
