🌑 ਪੱਤਰਕਾਰੀ ਦਾ ਨਵਾਂ ਸਫ਼ਰ ਸ਼ੁਰੂ ਕਰਨ ਤੋਂ ਪਹਿਲਾਂ ਹੁਣ ਤੱਕ ਦੇ ਸਫ਼ਰ ਉੱਤੇ ਇੱਕ ਸਰਸਰੀ ਝਾਤ

🌑 ਪੱਤਰਕਾਰੀ ਦੇ ਮਿਆਰ ਨੂੰ ਹਮੇਸ਼ਾ ਕਾਇਮ ਰੱਖਣ ਦੇ ਸੰਕਲਪ ਨਾਲ ਜਲਦ ਹੀ ਪਾਠਕਾਂ ਦੇ ਰੁਬਰੂ ਹੋਵਾਂਗਾ ਆਪਣੀ ਨਿਊਜ਼ ਵੈਬਸਾਈਟ ‘ਰੋਜ਼ਾਨਾ ਖ਼ਬਰ’ ਰਾਹੀਂ www.rozanakhabar.in ✍️
-ਜਿੰਦਗੀ ਦਾ ਇੱਕ ਵੱਡਾ ਹਿੱਸਾ ਮੈਂ ਹੁਣ ਤੱਕ ਪੱਤਰਕਾਰੀ ਦੇ ਖੇਤਰ ਵਿੱਚ ਗੁਜਾਰਿਆ ਹੈ ਅਤੇ ਵੱਖ-ਵੱਖ ਮੀਡੀਆ ਅਦਾਰਿਆਂ ਨਾਲ ਜੁੜੇ ਰਹਿ ਕੇ ਪੱਤਰਕਾਰੀ ਦੀਆਂ ਕਦਰਾਂ-ਕੀਮਤਾਂ ’ਤੇ ਪਹਿਰਾ ਦਿੰਦਿਆਂ ਇਮਾਨਦਾਰੀ ਅਤੇ ਸੰਜ਼ੀਦਗੀ ਨਾਲ ਆਪਣੇ ਕੰਮ ਨੂੰ ਅੰਜਾਮ ਦਿੱਤਾ ਹੈ। ਪੱਤਰਕਾਰਿਤਾ ਵਿੱਚ ਪੋਸਟ ਗੈ੍ਰਜੂਏਸ਼ਨ ਡਿਪਲੋਮਾ ਇਨ ਜਰਨਲਿਜ਼ਮ ਅਤੇ ਮਾਸ ਕਮਿਊਨੀਕੇਸ਼ਨ ਵਿੱਚ ਮਾਸਟਰ ਡਿਗਰੀ ਦੀ ਪੜ੍ਹਾਈ ਕਰਨ ਤੋਂ ਬਾਅਦ ਹੀ ਸਾਲ 2003 ਵਿੱਚ ਮੀਡੀਆ ਦੇ ਖੇਤਰ ਵਿੱਚ ਪੈਰ ਰੱਖਿਆ ਸੀ। ਪੱਤਰਕਾਰੀ ਦੀ ਸ਼ੁਰੂਆਤ ਸਥਾਪਤ ਮੀਡੀਆ ਅਦਾਰਾ ਅਮਰ ਉਜਾਲਾ ਦੀ ਹਿੰਦੀ ਵਿੱਚ ਰੋਜ਼ਾਨਾ ਪ੍ਰਕਾਸ਼ਤਿ ਅਖ਼ਬਾਰ ਨਾਲ ਕੀਤਾ ਸੀ। ਇਸ ਤੋਂ ਬਾਅਦ ਹਿੰਦੀ ਦੀ ਸਥਾਪਤ ਇੱਕ ਹੋਰ ਅਖ਼ਬਾਰ ਦੈਨਿਕ ਜਾਗਰਣ ਵਿੱਚ ਵੀ ਪੱਤਰਕਾਰੀ ਕਰਨ ਦਾ ਮੌਕਾ ਮਿਲਿਆ। ਪੱਤਰਕਾਰੀ ਦੇ ਇਸ ਸਫ਼ਰ ਦੌਰਾਨ ਹੀ ਮੇਰੀ ਮੁਲਾਕਾਤ ਉਸ ਵੇਲੇ ਚੰਡੀਗੜ੍ਹ ਤੋਂ ਪ੍ਰਕਾਸ਼ਿਤ ਪੰਜਾਬੀ ਟ੍ਰਿਬਿਊਨ ਦੇ ਪੱਤਰਕਾਰ ਸ੍ਰੀ ਗੁਰਚਰਨ ਸਿੰਘ ਕਾਹਲੋਂ ਨਾਲ ਹੋਈ ਸੀ। ਸ੍ਰੀ ਕਾਹਲੋਂ ਇਸ ਵੇਲੇ ਪਰਿਵਾਰ ਸਮੇਤ ਅਸਟੇ੍ਰਲੀਆ ਵਿੱਚ ਰਹਿ ਰਹੇ ਹਨ।
ਠੀਕ ਤਰ੍ਹਾਂ ਯਾਦ ਨਹੀਂ ਸ਼ਾਇਦ ਸਾਲ 2005 ਦੀ ਗੱਲ ਹੈ ਜਦੋਂ ਉਨ੍ਹਾਂ ਦਾ ਪਰਿਵਾਰ ਸਮੇਤ ਅਸਟੇ੍ਰਲਿਆ ਜਾ ਕੇ ਵੱਸਣ ਦਾ ਪ੍ਰੋਗਰਾਮ ਬਣਿਆ ਸੀ ਤਾਂ ਉਨ੍ਹਾਂ ਮੇਰੇ ਸਾਹਮਣੇ ਪੰਜਾਬੀ ਟ੍ਰਿਬਿਊਨ ਅਖ਼ਬਾਰ ਵਿੱਚ ਕੰਮ ਕਰਨ ਦੀ ਤਜ਼ਵੀਜ ਰੱਖਦਿਆ ਦੱਸਿਆ ਸੀ ਕਿ ਅਸਟੇ੍ਰਲਿਆ ਜਾ ਰਹੇ ਹਨ। ਜੇਕਰ ਮਨ ਹੋਵੇ ਤਾਂ ਤੁਹਾਡੇ ਲਈ ਪੰਜਾਬੀ ਟ੍ਰਿਬਿਊਨ ਅਦਾਰੇ ਨਾਲ ਗੱਲ ਕਰਾਂ। ਉਸ ਵੇਲੇ ਮੈਨੂੰ ਸ੍ਰੀ ਕਾਹਲੋਂ ਦੀ ਤਜਵੀਜ਼ ਸਹੀ ਲਗੀ ਤਾਂ ਨਾਂਹ ਨਹੀਂ ਕਰ ਸੱਕਿਆ ਅਤੇ ਹਾਮੀ ਭਰ ਦਿੱਤੀ। ਮਿੱਥੇ ਪ੍ਰੋਗਰਾਮ ਅਨੁਸਾਰ ਬੱਸ ਫੜ੍ਹੀ ਅਤੇ ਚੰਡੀਗੜ੍ਹ ਚਲਾ ਗਿਆ ਅਤੇ ਪੰਜਾਬੀ ਟ੍ਰਿਬਿਊਨ ਦੇ ਇੱਕ ਸੀਨੀਅਰ ਨਿਊਜ਼ ਐਡੀਟਰ ਨੂੰ ਮਿਲਿਆ ਅਤੇ ਦੱਸਿਆ ਕਿ ਗੁਰਦਾਸੁਪਰ ਤੋਂ ਆਇਆ ਹਾਂ। ਉਨ੍ਹਾਂ ਨੂੰ ਹੀ ਆਪਣਾ ਬਾਈਓਡੇਟਾ ਅਤੇ ਕੁਝ ਖ਼ਬਰਾਂ ਜੋ ਮੈਂ ਹੱਥ ਨਾਲ ਲਿੱਖੀਆਂ ਹੋਈਆਂ ਸਨ ਫੋਟੋਆਂ ਸਮੇਤ ਫੜ੍ਹਾ ਆਇਆ।
ਖ਼ਬਰਾਂ ਅੱਗਲੇ ਦਿਨ ਹੀ ਅਖ਼ਬਾਰ ਵਿੱਚ ਮੇਰੇ ਨਾਂ ਹੇਠ ਪ੍ਰਕਾਸ਼ਿਤ ਹੋ ਗਈਆਂ ਸਨ ਜਿਸਦਾ ਸਿੱਧਾ ਮਤਲਬ ਸੀ ਕਿ ਅਦਾਰੇ ਵੱਲੋਂ ਮੇਰਾ ਬਾਇਓਡਾਟਾ ਪ੍ਰਵਾਨ ਕਰ ਲਿਆ ਗਿਆ ਹੈ ਅਤੇ ਖ਼ਬਰਾਂ ਭੇਜਣ ਦਾ ਅਧਿਕਾਰ ਦੇ ਦਿੱਤਾ ਗਿਆ ਹੈ। ਖ਼ਬਰਾਂ ਪ੍ਰਕਾਸ਼ਿਤ ਹੋਣ ਦੇ ਬਾਵਜ਼ੂਦ ਅਖ਼ਬਾਰ ਦਾ ਪਛਾਣ ਪੱਤਰ ਮਿਲਣ ਵਿੱਚ ਸਮਾਂ ਲਗ ਗਿਆ ਸੀ। ਜਦੋਂ ਮੈਂ ਪੰਜਾਬੀ ਟ੍ਰਿਬਿਊਨ ਅਖ਼ਬਾਰ ਵਿੱਚ ਕੰਮ ਸ਼ੁਰੂ ਕੀਤਾ ਸੀ ਤਾਂ ਉਸ ਵੇਲੇ ਮਰਹੂਮ ਸ੍ਰੀ ਸ਼ੰਗਾਰਾ ਸਿੰਘ ਭੁੱਲਰ ਅਖ਼ਬਾਰ ਦੇ ਮੁੱਖ ਸੰਪਾਦਕ ਸਨ। ਸਾਲ 2005 ਤੋਂ ਲੈ ਕੇ ਹੁਣ ਤੱਕ 20 ਸਾਲ ਦੇ ਕਰੀਬ ਪੱਤਰਕਾਰੀ ਦਾ ਇੱਕ ਲੰਮਾ ਸਫ਼ਰ ਪੰਜਾਬੀ ਟ੍ਰਿਬਿਊਨ ਨਾਲ ਤੈਅ ਕੀਤਾ ਹੈ। ਇਸ ਦੌਰਾਨ ਪੱਤਰਕਾਰੀ ਦੀਆਂ ਕਦਰਾਂ-ਕੀਮਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਪੱਤਰਕਾਰੀ ਦੇ ਖੇਤਰ ਵਿੱਚ ਆਪਣੀਆਂ ਸੇਵਾਵਾਂ ਨੂੰ ਤਰਜੀਹ ਦਿੱਤੀ ਹੈ। ਅਨੇਕਾਂ ਵਾਰ ਮੁਸ਼ਕਿਲ ਹਾਲਾਤਾਂ ਵਿੱਚ ਵੀ ਅਖ਼ਬਾਰ ਲਈ ਕਵਰੇਜ਼ ਕੀਤੀ ਹੈ। ਰੋਜ਼ਾਨਾ ਦੀਆਂ ਰੂਟੀਨ ਦੀਆਂ ਖ਼ਬਰਾਂ ਤੋਂ ਇਲਾਵਾ ਵੱਖ-ਵੱਖ ਵਿਸ਼ਿਆਂ ਉੱਤੇ ਲੇਖ ਵੀ ਪ੍ਰਕਾਸ਼ਿਤ ਹੋ ਚੁੱਕੇ ਹਨ।
ਜਿਸ ਵੇਲੇ ਮੈਂ ਪੰਜਾਬੀ ਟ੍ਰਿਬਿਊਨ ਵਿੱਚ ਆਪਣਾ ਪੱਤਰਕਾਰੀ ਦਾ ਸਫ਼ਰ ਸ਼ੁਰੂ ਕੀਤਾ ਸੀ ਉਸ ਵੇਲੇ ਜਿਨ੍ਹਾਂ ਸੀਨੀਅਰ ਪੱਤਰਕਾਰਾਂ ਨਾਲ ਸੰਪਰਕ ਹੋਇਆ ਸੀ ਉਨ੍ਹਾਂ ਵਿੱਚੋਂ ਜਿਆਦਾਤਰ ਹੁਣ ਪੰਜਾਬੀ ਟ੍ਰਿਬਿਊਨ ਤੋਂ ਸੇਵਾਮੁਕਤ ਹੋ ਚੁੱਕੇ ਹਨ ਜਾਂ ਛੱਡ ਚੁੱਕੇ ਹਨ। ਪੰਜਾਬੀ ਟ੍ਰਿਬਿਊਨ ਵਿੱਚ ਬਤੌਰ ਪੱਤਰਕਾਰ ਫੀਲਡ ਵਿੱਚ ਕੰਮ ਕਰਨ ਦੌਰਾਨ ਕਾਫ਼ੀ ਕੁਝ ਇਨ੍ਹਾਂ ਸਾਰਿਆਂ ਤੋਂ ਸਿੱਖਣ ਨੂੰ ਮਿਲਿਆ ਹੈ। ਧਾਰਨਾ ਹੈ ਕਿ ਇਨਸਾਨ ਦੀ ਸਿੱਖਿਆ ਕਦੇ ਵੀ ਪੂਰੀ ਨਹੀਂ ਹੁੰਦੀ ਅਤੇ ਸਾਰੀ ਉਮਰ ਹੀ ਕੁਝ ਨਾ ਕੁਝ ਨਵਾਂ ਸਿੱਖਦਾ ਹੈ। ਪੱਤਰਕਾਰੀ ਦੇ ਇਸ ਲੰਮੇ ਸਫ਼ਰ ਵਿੱਚ ਜਿੱਥੇ ਬਹੁਤ ਕੁਝ ਨਵਾਂ ਸਿੱਖਣ ਨੂੰ ਮਿਲਿਆ ਉੱਥੇ ਹੀ ਕਈ ਕੌੜੇ ਤੇ ਮਿੱਠੇ ਤਜ਼ਰਬੇ ਵੀ ਮਿਲੇ ਹਨ। ਅਜਿਹੇ ਕੌੜੇ ਮਿੱਠੇ ਤਜ਼ਰੱਬੇ ਨਾ ਹੁੰਦੇ ਤਾਂ ਸ਼ਾਇਦ ਅੱਜ ਆਪਣੀ ਨਿਊਜ਼ ਵੈਬਸਾਈਟ ਰਾਹੀਂ ਆਜ਼ਾਦ ਤੌਰ ’ਤੇ ਪੱਤਰਕਾਰੀ ਕਰਨ ਦਾ ਵਿਚਾਰ ਕਦੇ ਵੀ ਮਨ ਵਿੱਚ ਨਹੀਂ ਆਉਣਾ ਸੀ।
ਲਿਹਾਜ਼ਾ ਜਲਦ ਹੀ ਨਿਊਜ਼ ਵੈਬਸਾਈਟ ‘ਰੋਜ਼ਾਨਾ ਖ਼ਬਰ’ ਨਾਲ ਆਪ ਸਭ ਪਾਠਕਾਂ ਨਾਲ ਰੁਬਰੂ ਹੋਣ ਜਾ ਰਿਹਾ ਹਾਂ। ਭਰੋਸਾ ਹੈ ਕਿ ਪੱਤਰਕਾਰਿਤਾ ਅਤੇ ਸਮਾਜਿਕ ਕਦਰਾਂ-ਕੀਮਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਪਹਿਲਾਂ ਦੀ ਤਰ੍ਹਾਂ ਹੀ ਇਮਾਨਦਾਰੀ ਨਾਲ ਸਾਫ਼ ਸੁੱਥਰੀ, ਸਨਸਨੀਖੇਜ਼ ਤੋਂ ਰਹਿਤ ਅਤੇ ਸਹੀ ਸੂਚਨਾ ਪੇਸ਼ ਕਰਨ ਦੀ ਕੋਸ਼ਿਸ਼ ਕਰਾਂਗਾ ਅਤੇ ਉਸਾਰੂ ਭੂਮਿਕਾ ਨਿਭਾਵਾਂਗਾ। ਪੱਤਰਕਾਰੀ ਦੇ ਇਸ ਨਵੇਂ ਸ਼ੁਰੂ ਕਰਨ ਜਾ ਰਹੇ ਸਫ਼ਰ ਵਿੱਚ ਆਪ ਸਭ ਦੇ ਸੰਜੀਦਾ ਸਹਿਯੋਗ ਦੀ ਲੋੜ ਮਹਿਸੂਸ ਕਰਦਾ ਹਾਂ। ਅਪੀਲ ਹੈ ਕਿ ਮੇਰੇ ਆਨਲਾਈਨ ਅਖ਼ਬਾਰ ‘ਰੋਜ਼ਾਨਾ ਖ਼ਬਰ’ ਨੂੰ ਸਬਕ੍ਰਾਇਬ ਕਰਕੇ ਮੇਰੀ ਹੌਂਸਲਾਅਫ਼ਜਾਈ ਜਰੂਰ ਕਰਨਾ। ਰੋਜ਼ਾਨਾ ਅਖ਼ਬਾਰ ਉੱਤੇ ਪੁੱਜਣ ਲਈ ਲਿੰਕ ਹੈ- www.rozanakhabar.in
ਧੰਨਵਾਦ ਸਹਿਤ
ਜੇ.ਐੱਸ.ਬੈਂਸ…✍️