🕊️ ਸਰਧਾਂਜਲੀ ਸਮਾਗਮ ‘ਤੇ ਵਿਸ਼ੇਸ਼

ਸੁਖਦੇਵ ਸਿੰਘ ਭਾਗੋਕਾਵਾਂ ਸੰਪੂਰਨ ਕਮਿਊਨਿਸਟ ਵਾਂਗ ਜੀਵਿਆ

🌑 ਜਤਿੰਦਰ ਬੈਂਸ ਸੰਪਾਦਕ ਰੋਜ਼ਾਨਾ ਖ਼ਬਰ
ਕਾਮਰੇਡ ਸੁਖਦੇਵ ਸਿੰਘ ਭਾਗੋਕਾਵਾਂ ਦਾ ਜੀਵਨ ਸਿਰਫ਼ ਇੱਕ ਵਿਅਕਤੀ ਦੀ ਕਹਾਣੀ ਨਹੀਂ, ਸਗੋਂ ਇੱਕ ਵਿਚਾਰਧਾਰਾ ਨਾਲ ਨਿਭਾਈ ਗਈ ਅਟੱਲ ਵਫ਼ਾਦਾਰੀ ਦਾ ਪ੍ਰਤੀਕ ਸੀ।
ਸਾਲ 1953 ਵਿੱਚ ਤਹਿਸੀਲ ਗੁਰਦਾਸਪੁਰ ਦੇ ਪਿੰਡ ਭਾਗੋਕਾਵਾਂ ਵਿੱਚ ਇੱਕ ਸਧਾਰਣ ਕਿਸਾਨ ਪਰਿਵਾਰ ਵਿੱਚ ਜਨਮੇ ਸੁਖਦੇਵ ਸਿੰਘ ਆਪਣੇ ਭਰਾਵਾਂ-ਭੈਣਾਂ ਵਿੱਚ ਵੱਡੇ ਸਨ। ਬਚਪਨ ਤੋਂ ਹੀ ਉਹ ਸਾਦਗੀ ਅਤੇ ਸੰਘਰਸ਼ ਨਾਲ ਜੁੜੇ ਰਹੇ। ਮੁਢਲੀ ਸਿੱਖਿਆ ਪਿੰਡ ਦੇ ਗੁਰਦੁਆਰੇ ਦੇ ਸਕੂਲ ਤੋਂ ਪ੍ਰਾਪਤ ਕਰਨ ਤੋਂ ਬਾਅਦ, ਉਨ੍ਹਾਂ ਨੇ ਬਹਰਾਮਪੁਰ ਦੇ ਸਰਕਾਰੀ ਹਾਈ ਸਕੂਲ ਤੋਂ ਦਸਵੀਂ ਕੀਤੀ ਅਤੇ ਫਿਰ ਗੁਰੂ ਨਾਨਕ ਕਾਲਜ ਗੁਰਦਾਸਪੁਰ ਵਿੱਚ ਉੱਚ ਸਿੱਖਿਆ ਲਈ ਦਾਖਲਾ ਲਿਆ।
ਪਰ ਜ਼ਿੰਦਗੀ ਦਾ ਅਸਲ ਮੋੜ ਉਸ ਵੇਲੇ ਆਇਆ, ਜਦੋਂ ਉਹ ਮਾਰਕਸਵਾਦੀ ਵਿਚਾਰਧਾਰਾ ਨਾਲ ਰੂਬਰੂ ਹੋਏ। ਇਸ ਵਿਚਾਰਧਾਰਾ ਨੇ ਉਨ੍ਹਾਂ ਦੀ ਸੋਚ ਨੂੰ ਬਦਲ ਦਿੱਤਾ ਅਤੇ ਨਿੱਜੀ ਸੁਪਨਿਆਂ ਦੀ ਥਾਂ ਸਮਾਜ ਦੀ ਭਲਾਈ ਲਈ ਜੀਵਨ ਸਮਰਪਿਤ ਕਰਨ ਦਾ ਰਾਹ ਦਿਖਾਇਆ। ਮਾਰਕਸ, ਐਂਗਲਜ਼, ਲੈਨਿਨ ਅਤੇ ਮਾਓ ਦੇ ਵਿਚਾਰਾਂ ਨੂੰ ਪੜ੍ਹ ਕੇ ਉਨ੍ਹਾਂ ਨੇ ਇਸਨੂੰ ਆਪਣੇ ਜੀਵਨ ਦਾ ਅਟੁੱਟ ਹਿੱਸਾ ਬਣਾ ਲਿਆ।
ਉਹ ਵਿਦਿਆਰਥੀਆਂ, ਨੌਜਵਾਨਾਂ, ਮਜ਼ਦੂਰਾਂ ਅਤੇ ਕਿਸਾਨਾਂ ਨੂੰ ਇਕੱਠਾ ਕਰਨ ਲਈ ਸਦਾ ਸਰਗਰਮ ਰਹੇ। ਉਨ੍ਹਾਂ ਦਾ ਜੀਵਨ ਸਾਬਤ ਕਰਦਾ ਹੈ ਕਿ ਕਮਿਊਨਿਸਟ ਹੋਣਾ ਸਿਰਫ਼ ਨਾਅਰੇ ਲਾਉਣਾ ਨਹੀਂ, ਸਗੋਂ ਉਸ ਰਾਹ ‘ਤੇ ਅੰਤ ਤੱਕ ਡਟੇ ਰਹਿਣਾ ਹੁੰਦਾ ਹੈ।
ਕਾਮਰੇਡ ਸੁਖਦੇਵ ਸਿੰਘ ਨੇ ਆਪਣੀ ਜ਼ਿੰਦਗੀ ਦੌਰਾਨ ਕਈ ਵਾਰ ਜੇਲਾਂ ਵੀ ਕੱਟੀਆਂ, ਪਰ ਕਦੇ ਵੀ ਆਪਣੇ ਅਸੂਲਾਂ ਨਾਲ ਸਮਝੌਤਾ ਨਹੀਂ ਕੀਤਾ। ਉਹ ਘੱਟ ਬੋਲਦੇ ਸਨ, ਪਰ ਹਮੇਸ਼ਾਂ ਸਚ ਦੇ ਨਾਲ ਖੜ੍ਹੇ ਰਹਿੰਦੇ ਸਨ। ਨਿਡਰਤਾ, ਸਾਦਗੀ ਅਤੇ ਕਹਿਣੀ-ਕਰਨੀ ਦੀ ਇਕਸਾਰਤਾ ਉਨ੍ਹਾਂ ਦੀ ਪਹਚਾਣ ਸੀ।
ਉਨ੍ਹਾਂ ਨੇ ਕਦੇ ਵੀ ਅਹੁਦਿਆਂ ਜਾਂ ਸ਼ੋਹਰਤ ਦੀ ਲਾਲਸਾ ਨਹੀਂ ਰੱਖੀ। ਇੱਥੋਂ ਤੱਕ ਕਿ ਘਰੇਲੂ ਮੁਸ਼ਕਲਾਂ ਦੇ ਬਾਵਜੂਦ ਵੀ ਉਨ੍ਹਾਂ ਨੇ ਪਾਰਟੀ ਕੰਮਾਂ ਨੂੰ ਤਰਜੀਹ ਦਿੱਤੀ। ਉਨ੍ਹਾਂ ਦਾ ਘਰ ਕਈ ਸਾਲਾਂ ਤੱਕ ਪਾਰਟੀ ਗਤੀਵਿਧੀਆਂ ਦਾ ਕੇਂਦਰ ਬਣਿਆ ਰਿਹਾ।
ਅੱਜ ਦੇ ਪਦਾਰਥਵਾਦੀ ਯੁੱਗ ਵਿੱਚ ਜਿੱਥੇ ਵਿਚਾਰਧਾਰਾ ਨਾਲ ਜੁੜੇ ਰਹਿਣਾ ਔਖਾ ਹੋ ਗਿਆ ਹੈ, ਉੱਥੇ ਸੁਖਦੇਵ ਸਿੰਘ ਭਾਗੋਕਾਵਾਂ ਵਰਗੇ ਲੋਕ ਸਾਨੂੰ ਦਿਖਾਉਂਦੇ ਹਨ ਕਿ ਅਸਲ ਸੰਘਰਸ਼ ਕੀ ਹੁੰਦਾ ਹੈ।

📍 ਕਾਮਰੇਡ ਸੁਖਦੇਵ ਸਿੰਘ ਭਾਗੋਕਾਵਾਂ ਦੀ ਯਾਦ ਵਿੱਚ
ਸ਼ਰਧਾਂਜਲੀ ਸਮਾਗਮ 2 ਅਪ੍ਰੈਲ ਨੂੰ ਪਿੰਡ ਭਾਗੋਕਾਵਾਂ ਦੇ ਗੁਰਦੁਆਰਾ ਸਾਹਿਬ ਦੇ ਬਾਹਰ ਲਾਅਨ ਵਿਖੇ ਹੋਵੇਗਾ।