🌑ਗੁਰਦਾਸਪੁਰੀਆ ਲਈ ਵਰਦਾਨ ਸਾਬਤ ਹੋ ਰਹੀ ਹਾਕੀ ਤਿੱਕੜੀ

🌑ਰੋਜ਼ਾਨਾ ਖ਼ਬਰ
🌑ਭਾਰਤੀ ਹਾਕੀ ਟੀਮ ਦੇ ਸਾਬਕਾ ਸਟਾਰ ਖਿਡਾਰੀ ਜੁਗਰਾਜ ਸਿੰਘ, ਗੁਰਵਿੰਦਰ ਸਿੰਘ ਚੰਦੀ ਅਤੇ ਰੁਪਿੰਦਰ ਪਾਲ ਸਿੰਘ ਗੁਰਦਾਸਪੁਰ ਜ਼ਿਲ੍ਹੇ ਅੰਦਰ ਹੜ੍ਹਾਂ ਨਾਲ ਪੀੜਤ ਲੋਕਾਂ ਲਈ ਸੱਚੇ ਸੇਵਾਦਾਰ ਵਜੋਂ ਕੰਮ ਕਰ ਰਹੇ ਹਨ। ਜਿੱਥੇ ਸਰਕਾਰੀ ਮਸ਼ੀਨਰੀ ਅਤੇ ਜ਼ਿਲਾ ਪ੍ਰਸ਼ਾਸਨ ਦਿਨ-ਰਾਤ ਮਦਦ ਕਰ ਰਿਹਾ ਹੈ, ਉੱਥੇ ਇਹ ਹਾਕੀ ਤਿੱਕੜੀ ਵੀ ਸਿਵਲ ਅਤੇ ਪੁਲਿਸ ਸੇਵਾਵਾਂ ਨਾਲ ਜੁੜ ਕੇ ਲੋਕਾਂ ਦੀ ਸੇਵਾ ਵਿੱਚ ਮਿਸਾਲ ਬਣੀ ਹੋਈ ਹੈ। ਹੁਣ ਤੱਕ ਜ਼ਿਲ੍ਹੇ ਵਿੱਚ 5581 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਗਿਆ ਹੈ।

ਜੁਗਰਾਜ ਸਿੰਘ – ਹੜ੍ਹਾਂ ਵਿੱਚ ਮੂਹਰਲੇ ਸੂਰਮੇ
2001 ਜੂਨੀਅਰ ਵਰਲਡ ਕੱਪ ਚੈਂਪੀਅਨ, 2002 ਬੁਸਾਨ ਏਸ਼ੀਅਨ ਗੇਮਜ਼ ਸਿਲਵਰ ਮੈਡਲਿਸਟ ਅਤੇ ਵਿਸ਼ਵ ਪ੍ਰਸਿੱਧ ਡਰੈਗ ਫਲਿੱਕਰ ਜੁਗਰਾਜ ਸਿੰਘ ਇਸ ਵੇਲੇ ਗੁਰਦਾਸਪੁਰ ਵਿੱਚ ਐਸ.ਪੀ. ਵਜੋਂ ਤਾਇਨਾਤ ਹਨ। ਉਹ ਭਾਰਤੀ ਫੌਜ, ਬੀ.ਐਸ.ਐਫ. ਅਤੇ ਐਨ.ਡੀ.ਆਰ.ਐਫ. ਦੀਆਂ ਟੀਮਾਂ ਨਾਲ ਮਿਲ ਕੇ ਹੜ੍ਹ-ਬਚਾਅ ਕਾਰਜਾਂ ਦੀ ਅਗਵਾਈ ਕਰ ਰਹੇ ਹਨ। ਕੇਂਦਰੀ ਮੰਤਰੀ ਦੇ ਦੌਰੇ ਦੌਰਾਨ ਉਹਨਾਂ ਨੇ ਕਿਸ਼ਤੀ ਰਾਹੀਂ ਨੁਕਸਾਨ-ਗ੍ਰਸਤ ਖੇਤਰਾਂ ਦਾ ਜਾਇਜ਼ਾ ਵੀ ਕਰਵਾਇਆ। ਯਾਦ ਰਹੇ ਕਿ 2015 ਵਿੱਚ ਦੀਨਾਨਗਰ ਵਿੱਚ ਹੋਏ ਅਤਿਵਾਦੀ ਹਮਲੇ ਵਿੱਚ ਵੀ ਉਹਨਾਂ ਨੇ ਮੋਹਰੀ ਭੂਮਿਕਾ ਨਿਭਾਈ ਸੀ।

ਗੁਰਵਿੰਦਰ ਸਿੰਘ ਚੰਦੀ – ਲੋਕਾਂ ਦਾ ਸੱਚਾ ਸੇਵਾਦਾਰ
2014 ਇੰਚੇਓਨ ਏਸ਼ੀਅਨ ਗੇਮਜ਼ ਗੋਲਡ ਮੈਡਲਿਸਟ ਅਤੇ ਓਲੰਪੀਅਨ ਗੁਰਵਿੰਦਰ ਸਿੰਘ ਚੰਦੀ ਕਲਾਨੌਰ ਵਿੱਚ ਡੀ.ਐਸ.ਪੀ. ਵਜੋਂ ਤਾਇਨਾਤ ਹਨ। ਉਹ ਰਾਹਤ ਕਾਰਜਾਂ ਦੀ ਅਗਵਾਈ ਕਰਦੇ ਹੋਏ ਨਾ ਸਿਰਫ਼ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ਤੱਕ ਪਹੁੰਚਾ ਰਹੇ ਹਨ, ਬਲਕਿ ਰਾਹਤ ਸਮੱਗਰੀ ਵੰਡਣ ਵਿੱਚ ਵੀ ਅੱਗੇ ਰਹੇ। ਇੱਕ ਬਜ਼ੁਰਗ ਨੂੰ ਸੱਪ ਦੇ ਡੰਗ ਤੋਂ ਬਚਾਉਂਦੇ ਹੋਏ ਹਸਪਤਾਲ ਤੱਕ ਪਹੁੰਚਾਇਆ ਗਿਆ, ਜਦਕਿ ਇੱਕ ਗਰਭਵਤੀ ਮਹਿਲਾ ਨੂੰ ਸੁਰੱਖਿਅਤ ਥਾਂ ਲਿਜਾਇਆ ਗਿਆ ਜਿੱਥੇ ਅਗਲੇ ਦਿਨ ਉਸ ਦਾ ਜਣੇਪਾ ਹੋਇਆ। ਪਾਣੀ ਨਾਲ ਭਰੀ ਗਊਸ਼ਾਲਾ ਵਿੱਚੋਂ ਗਾਵਾਂ ਨੂੰ ਬਚਾਉਣ ਦੀ ਮਿਸਾਲ ਵੀ ਉਹਨਾਂ ਨੇ ਪੇਸ਼ ਕੀਤੀ।

ਰੁਪਿੰਦਰ ਪਾਲ ਸਿੰਘ – ਓਲੰਪਿਕ ਮੈਡਲਿਸਟ ਦੀ ਜਨ ਸੇਵਾ
ਟੋਕੀਓ ਓਲੰਪਿਕਸ ਦੇ ਮੈਡਲਿਸਟ ਅਤੇ ਸਵਾ ਸੌ ਤੋਂ ਵੱਧ ਕੌਮਾਂਤਰੀ ਗੋਲ ਕਰਨ ਵਾਲੇ ਡਰੈਗ ਫਲਿੱਕਰ ਰੁਪਿੰਦਰ ਪਾਲ ਸਿੰਘ, ਜੋ ਕਿ ਇਸ ਵੇਲੇ ਪੀ.ਐਸ.ਸੀ. ਅਧਿਕਾਰੀ ਵਜੋਂ ਗੁਰਦਾਸਪੁਰ ਦੇ ਸਹਾਇਕ ਕਮਿਸ਼ਨਰ ਹਨ, ਹੜ੍ਹ ਪੀੜਤਾਂ ਦੀ ਸੇਵਾ ਵਿੱਚ ਲੱਗੇ ਹੋਏ ਹਨ। ਉਹ ਰਾਹਤ ਸਮੱਗਰੀ ਦੇ ਪ੍ਰਬੰਧ ਤੋਂ ਲੈ ਕੇ ਲੋਕਾਂ ਦੀਆਂ ਜ਼ਰੂਰਤਾਂ ਪੂਰੀ ਕਰਨ ਵਿੱਚ ਸਰਗਰਮ ਹਨ।

ਲੋਕਾਂ ਲਈ ਮਿਸਾਲ
ਰਾਵੀ ਦਰਿਆ ਦੀ ਮਾਰ ਝੱਲ ਰਹੇ ਗੁਰਦਾਸਪੁਰ ਜ਼ਿਲ੍ਹੇ ਵਿੱਚ ਇਹ ਹਾਕੀ ਤਿੱਕੜੀ 24 ਘੰਟੇ ਮੁਸਤੈਦੀ ਨਾਲ ਸੇਵਾ ਕਰ ਰਹੀ ਹੈ। ਲੋਕਾਂ ਦੀ ਜਾਨ-ਮਾਲ ਦੀ ਰਾਖੀ ਅਤੇ ਉਹਨਾਂ ਦੀਆਂ ਲੋੜਾਂ ਪੂਰੀਆਂ ਕਰਨ ਵਿੱਚ ਇਹ ਖਿਡਾਰੀ ਪ੍ਰੇਰਣਾਦਾਇਕ ਮਿਸਾਲ ਬਣੇ ਹੋਏ ਹਨ।